ഭക്ഷ‍്യസുരക്ഷാ വകുപ്പിന്‍റെ പരിശോധന; മന്തിക്കും ,ബിരിയാണിക്കും പാതി വിലയ്ക്ക് നൽകുന്ന 100 കിലോ പഴകിയ കോഴിയിറച്ചി പിടികൂടി :-


 26.06.2025 


 കോഴിക്കോട്: മന്തി ,ബിരിയാണി ഉണ്ടാക്കാൻ ഹോട്ടലുകളിലും, ഷവർമ കടകളിലും വിതരണം ചെയ്യുന്നതിനായി മലപ്പുറത്ത് നിന്നും കോഴിക്കോട് എത്തിച്ച  പഴകിയ പാതി വിലയ്ക്കു നൽകുന്ന കോഴിയിറച്ചി ഭക്ഷ‍്യസുരക്ഷാവിഭാഗം പിടികൂടി. മാനാഞ്ചിറയ്ക്ക് സമീപത്തെ വാഹനത്തിൽ നിന്നുമാണ് 100 കിലോ കോഴിയിറച്ചി പിടികൂടിയത്. 500 കിലോയോളം ഇറച്ചിയുമായാണ് വാഹനം കോഴിക്കോട് എത്തിയിരുന്നത്. എന്നാൽ ഇതിന്‍റെ ബാക്കി വിതരണം ചെയ്തിട്ടുണ്ട്.


നാട്ടുകാർ വിവരം നൽകിയതിന്‍റെ അടിസ്ഥാനത്തിലാണ് ഭക്ഷ‍്യസുരക്ഷാവിഭാഗം പരിശോധന നടത്തിയതും തുടർന്ന് കോഴിയിറച്ചി കണ്ടെത്തിയതും. സുരക്ഷാ മാനദണ്ഡങ്ങൾ പാലിക്കാതെയാണ് ഇറച്ചിയെത്തിയതെന്ന് ഭക്ഷ‍്യസുരക്ഷാവിഭാഗം അസി. കമ്മിഷണർ സക്കീർ ഹുസൈൻ പറഞ്ഞു.


ഇറച്ചി വിതരണം ചെയ്യുന്ന സ്ഥാപനത്തിനെതിരേ നടപടിയെടുക്കുമെന്നും ഉടമയോട് ഹാജരാവാൻ ആവശ‍്യപ്പെട്ടെന്നും അദ്ദേഹം കൂട്ടിച്ചേർത്തു. സംസ്കരിക്കുന്നതിനായി ഇറച്ചി കോഴിക്കോട് കോർപ്പറേഷന് കൈമാറിയിട്ടുണ്ട്.