നരിക്കുനി ഫെസ്റ്റ്: ഒരുക്കങ്ങൾ അന്തിമഘട്ടത്തിൽ
നരിക്കുനി: നാടിന് ഉത്സവനാളുകൾ സമ്മാനിക്കുന്ന നരിക്കുനി ഫെസ്റ്റ് ശനി വൈകിട്ട് തുടങ്ങും. ഫെസ്റ്റിന്റെ ഒരുക്കങ്ങളെല്ലാം അന്തിമഘട്ടത്തിലാണെന്ന് സ്വാഗതസംഘം ചെയർമാൻ സി.കെ.സലീം അറിയിച്ചു. പടനിലം റോഡ് ജംക്ഷനിലെ വിശാലമായ സ്ഥലത്താണ് ഫെസ്റ്റ് ഒരുക്കിയിരിക്കുന്നത്.
ഉദ്ഘാടന സമ്മേളനത്തിനുശേഷം കലാസാംസ്കാരിക പരിപാടികൾ അരങ്ങേറും. തുടർന്നുള്ള ദിവസങ്ങളിലായി സുരഭി ലക്ഷ്മിയും വിനോദ് കോവൂരും അവതരിപ്പിക്കുന്ന സ്റ്റേജ് ഷോ, ഗിന്നസ് മനോജിന്റെ കോമഡി ഷോ, ചലച്ചിത്ര പിന്നണി ഗായിക ദുർഗ വിശ്വനാഥിന്റെയും കലാഭവൻ പ്രദീഷിന്റെയും ഗാനമേള, നാടൻ പാട്ടുകൾ, കണ്ണൂർ ഷരീഫിന്റെ ഗാനമേള, ജാനു തമാശകളും പാട്ടുകളും, കലാമണ്ഡലം സത്യവ്രതന്റെ ഡാൻസ് ഫ്യൂഷൻ, പ്രഭാകരൻ പുന്നശ്ശേരിയുടെ ഓട്ടംതുള്ളൽ, മാജിക് ഷോ കരോക്കെ ഗാനമേള മാർഗംകളി, ഗ്രൂപ്പ് ഡാൻസ് ചവിട്ട് നാടകം, ചാക്യാർകൂത്ത് തുടങ്ങിയ വിവിധതരങ്ങളും വ്യത്യസ്തങ്ങളുമായ കലാസാംസ്കാരിക പരിപാടികളും ഉണ്ടായിരിക്കും.
നൃത്തനൃത്യങ്ങൾ, ഒപ്പന, കരാട്ടെ പ്രദർശനം, കളരിപ്പയറ്റ്, മറ്റ് പ്രാദേശിക കലാപരിപാടികൾ എന്നിവ അവതരിപ്പിക്കും. കുട്ടികൾക്കും മുതിർന്നവർക്കും ഒരേ പോലെ ആകർഷകമായ യന്ത്ര ഊഞ്ഞാൽ ആകാശത്തോണി ഡ്രാഗൺ ട്രെയിൻ, ജമ്പിങ് മാട്രസ്, ചിൽഡ്രൻസ് ബലൂൺ, സെൽഫി കോർണർ, ഫ്ലവർ ഷോ, പെറ്റ് ഷോ, ചിൽഡ്രൻസ് പാർക്ക്, വിവിധ റൈഡുകൾ എന്നിവ ഉണ്ടാകും. വിപുലമായ അക്വേറിയവും കാണികൾക്കായി ഒരുങ്ങുന്നുണ്ട്.
വാണിജ്യപ്രദർശനങ്ങളും പവലിയനിൽ ഉണ്ടാകും. പരിപാടിയുടെ വിജയിപ്പിക്കുന്നതിന് വേണ്ടി ചെയർമാൻ ഗ്രാമപഞ്ചായത്ത് പ്രിസിഡണ്ട് സി.കെ. സലീം ചെയർമാനും പി. ശരീന്ദ്രൻ മാസ്റ്റർ ജനറൽ കൺവീനറും മെമ്പർ ടി. രാജു ട്രഷററുമായി വിപുലമായ സ്വാഗത സംഘ കമ്മറ്റി പ്രവർത്തിച്ചു വരുന്നു.
ഗ്രാമപഞ്ചായത്തിന്റെ നേതൃത്വത്തിൽ ജനകീയ പങ്കാളിത്തത്തോടെ നടത്തുന്ന നരിക്കുനി ഫെസ്റ്റ് വ്യാപാര മേഖലക്കും പുത്തനുണർവേകും.
ഫെബ്രുവരി 22ന് സമാപിക്കും.
0 അഭിപ്രായങ്ങള്