നന്മണ്ട സബ് ആർ.ടി ഓഫീസിൽ വിജിലൻസിന്റെ മിന്നൽ പരിശോധന:-ഏജന്റിൽ നിന്നും കണക്കിൽപ്പെടാത്ത തുക പിടിച്ചെടുത്തു - :-


          19.05.2025 


നൻമണ്ട - :-നന്മണ്ട സബ് ആർ.ടി ഓഫീസിലെ ഉദ്യോഗസ്ഥർ ഡ്രൈവിങ് ടെസ്റ്റ്, ഫിറ്റ്നെസ് ടെസ്റ്റ്, മറ്റ് ഓഫീസ് സേവനങ്ങൾ എന്നിവയ്ക്കായി വരുന്ന ആളുകളിൽ  നിന്നും ഏജൻ്റ്മാർ മുഖേന കൈക്കൂലി വാങ്ങുന്നതായും, വൈകുന്നേരം 5 മണി കഴിഞ്ഞുള്ള സമയങ്ങളിൽ ജോയിൻ്റ് ആർ.ടി.ഓ യുടെ ഓഫീസ് മുറിയിൽ കണക്കും പണവുമായി ഏജന്റുമാർ എത്തി പണം കൈമാറുന്നതായും വിജിലൻസിന് വിവരം ലഭിച്ചിരുന്നു. ഈ വിവരത്തിന്റെ അടിസ്ഥാനത്തിൽ വിജിലൻസ്  (19.05.2025) നന്മണ്ട സബ് ആർ.ടി ഓഫീസിൽ ഒരു മിന്നൽ പരിശോധന നടത്തി. വൈകിട്ട് 05.20 ന് ആരംഭിച്ച മിന്നൽ പരിശോധന വൈകിയും തുടരുന്നു. മിന്നൽ പരിശോധനയിൽ ജോയിൻ്റ് ആർ.ടി.ഓ യുടെ ഓഫീസിനുള്ളിൽ ഉണ്ടായിരുന്ന ഒരു ഏജന്റിന്റെ കൈവശം കാണപ്പെട്ട ബാഗിൽ നിന്നും കണക്കിൽപ്പെടാത്ത 65,850/- രൂപ വിജിലൻസ് പിടിച്ചെടുത്തു.


പൊതുജനങ്ങളുടെ ശ്രദ്ധയിൽ അഴിമതി സംബന്ധിച്ച വിവരങ്ങൾ ലഭിക്കുകയാണെങ്കിൽ വിജിലൻസിന്റെ ടോൾ ഫ്രീ നമ്പരായ 1064 എന്ന നമ്പരിലോ 8592900900 എന്ന നമ്പരിലോ വാട്ട്സ്ആപ്പ് നമ്പരായ 9447789100 എന്ന നമ്പരിലോ അറിയിക്കണമെന്ന് വിജിലൻസ് ഡയറക്ടർ ശ്രീ. മനോജ് എബ്രഹാം ഐ.പി.എസ് അഭ്യർത്ഥിച്ചു.