രക്തബന്ധം ഒന്ന്, രാഷ്ട്രീയരംഗം മൂന്ന് — ചേളന്നൂരിൽ അപൂർവ മത്സരം:-
_𝟐6 - 11 - 𝟐𝟎𝟐𝟓_
ചേളന്നൂർ:
ചേളന്നൂർ ഗ്രാമ പഞ്ചായത്ത് തിരഞ്ഞെടുപ്പിൽ 18-ാം വാർഡിൽ ഒരേ കുടുംബത്തിലെ ഇളയച്ഛനും മക്കളുമാണ് തമ്മിൽ മത്സരിക്കുന്നത്. രക്തബന്ധത്തിൽ ഒരുമിച്ചെങ്കിലും രാഷ്ട്രീയരംഗത്ത് മൂന്ന് വഴിയിലായി നിലകൊള്ളുന്ന ഇവരുടെ ത്രികോണ മത്സരം വാർഡിൽ വലിയ ചര്ച്ചയാകുകയാണ്.
സി.പി.എം സ്ഥാനാർത്ഥി വി. കനകരാജ്, ബി.ജെ.പി സ്ഥാനാർത്ഥി പി.ടി. സുധീഷ്, യു.ഡി.എഫ് സ്ഥാനാർത്ഥി വി. അഖിലേഷ് - ഇവരാണ് മത്സരിക്കുന്നത്.
വാസ്തു ശിൽപ്പശാസ്ത്ര വിദഗ്ധനായ കുമാരനാചാരിയുടെ മകനാണ് വി. കനകരാജ്. അദ്ദേഹത്തിന്റെ സഹോദരന്മാരുടെ മക്കളാണ് രണ്ടുപേരും. വിശ്വകർമ സഭ മുൻ സംസ്ഥാന സെക്രട്ടറി പരേതനായ പി.ടി. വാസുവിൻ്റെ മകനുമാണ് പി.ടി. സുധീഷ്. വാസ്തു വിദഗ്ധനായ കൃഷ്ണൻ ആചാരിയുടെ മകനാണ് വി. അഖിലേഷ്.
ഇളയച്ഛന്റെയും, മക്കളുടെയും ഇങ്ങനെ തെരഞ്ഞെടുപ്പ് രംഗത്ത് ത്രികോണ മത്സരത്തിൽ ഇറങ്ങുന്നത് ചേളന്നൂരിൽ അപൂർവ കാഴ്ചയാണ്.
രാഷ്ട്രീയ രംഗം വിഭിന്നമാണെങ്കിലും വെള്ളിയാറാട്ട് ദേവി ക്ഷേത്രത്തിന്റെ ഭാരവാഹികളും, കൂടാതെ കാർപെന്റർ ജോലികൾ ഒരുമിച്ച് ചെയ്യുന്നവരുമാണ് ഇവർ.
വാർഡിലെ കോൺഗ്രസിൻ്റെ കുത്തക ഇടതുപക്ഷ വോട്ടുകൾ കൊണ്ട് മറികടക്കാൻ കഴിയുമെന്ന് വി. കനകരാജനും, ഭരണ തുടർച്ച ലക്ഷ്യമിട്ട് അഖിലേഷും രംഗത്തിറങ്ങുമ്പോൾ, ലോകസഭ തിരഞ്ഞെടുപ്പിൽ രണ്ടാം സ്ഥാനത്ത് നിന്ന ജനപ്രീതിയെ ഉയർത്തി ഒന്നാം സ്ഥാനത്തേക്ക് എത്താൻ സുധീഷും ശ്രമിക്കുന്നു.
മൂന്ന് ബന്ധുക്കളുടെ ഈ സൗഹൃദ ത്രികോണ പോരാട്ടം ചേളന്നൂർ 18-ാം വാർഡ് ഈ തിരഞ്ഞെടുപ്പിലെ ശ്രദ്ധേയ കേന്ദ്രങ്ങളിലൊന്നാക്കി മാറ്റിയിരിക്കുകയാണ്.
0 അഭിപ്രായങ്ങള്